CAUAYAN CITY – Natutuwa ang pamunuan ng Cauayan City Airport Police Station sa pagkakatanghal na Nationwide Best Airport Police Station of the Year category B.
Sa naging panayam ng Bombo Radyo Cauayan kay PCpt. Julio Maribbay, hepe ng Aviation Security Group, sinabi niya na ang award ay iginawad sa kanila ni PNP Chief PGen. Rodolfo Azurin Jr. kasabay ng 31st Founding Anniversary ng AVSEGroup sa Pasay City.
Ito ay bunga ng kanilang teamwork hindi lamang sa pagpapatupad ng peace and order sa loob ng Cauayan City Airport maging sa mga mananakay at napanatili nila ang magandang pamamalakad at kaayusan sa paliparan.
Unang pagkakataon na makatanggap ang Cauayan Airport Police Station ng ganitong award kaya mas lalo pa nilang paghuhusayin ang kanilang trabaho.
Mahigpit ang kanilang pagmomonitor sa mga dumarating at lumalabas sa paliparan at regular din ang pagsasagawa nila ng Oplan Bandillo upang patuloy na paalalahanan ang lahat ng mga sasakay sa eroplano ng mga maaari at hindi maaaring dalhin kapag bumiyahe.
