Sinabi ng private prosecutor Atty. Lorna Kapunan na hinahanap pa nila ang kontrobersyal na pangalang “Mary Grace Piattos,” na lumitaw sa mga acknowledgment receipt ng Office of the Vice President (OVP) na isinumite sa Commission on Audit (COA).
Sa pagdinig ng impeachment trial laban kay Vice President Sara Duterte, muling inilatag ng prosekusyon ang mga resibong may kuwestiyonableng pangalan, kabilang na ang “Mary Grace Piattos.”
Ayon sa impeachment trial private prosecutor, nakatanggap umano ng P70,000 para sa payment for medicine si “Mary Grace Piattos.” Isa pang nakapangalan ay si “Renan Piattos” na umano’y tumanggap ng P110,000 para sa purchase of information.
Nang tanungin kung ihaharap nila ito bilang testigo, sinabi ni Kapunan, “Hinahanap pa namin,” at pabirong idinagdag na hindi pa rin nila ito natatagpuan.
Kabilang ang pangalang “Mary Grace Piattos” sa mga resibong isinumite kaugnay ng paggamit ng confidential funds ng OVP.
Bukod dito, ipinakita rin ng prosekusyon ang iba pang resibo na may mga pangalang gaya ng “Andy Lim,” “Patty Ting,” at “Mico Harina.”
