Inanunsyo ng American rapper na si Macklemore ang sarili niyang Free Palestine Tour matapos siyang alisin bilang supporting act sa Loop Tour ng British singer na si Ed Sheeran dahil sa mga pahayag nito tungkol sa Palestine.
Sa dalawang concert sa New Jersey nitong unang bahagi ng buwan, nanawagan si Macklemore ng Free Palestine at sinabi sa mga Palestinian na hindi sila nakakalimutan.
Matapos nito, inalis siya sa US leg ng tour ni Sheeran. Ayon naman kay Sheeran, ang desisyon ay ginawa ng mga tour promoter at hindi niya personal na desisyon.
Sa kanyang social media post, sinabi ni Macklemore na ang nangyari sa kanya ay higit pa sa usapin ng isang artist o isang entablado, at nanawagan siya sa publiko na bigyang-pansin ang usapin ng mga boses na pinipigilang marinig.
Inanunsyo rin ng rapper ang tatlong concert sa London, Paris at Dublin sa huling bahagi ng Oktubre, habang may mga nakatakda ring show sa United States.
Ayon kay Macklemore, mapupunta ang lahat ng kikitain mula sa kanyang Free Palestine Tour sa mga organisasyong sumusuporta sa mga Palestinian.
Samantala, nagpahayag na rin si Sheeran tungkol sa sitwasyon sa Gaza sa isang concert sa Philadelphia, kung saan inilarawan niya itong catastrophic, unjustifiable at disproportionate.
Bukod kay Macklemore, tatlo pang supporting artists, kabilang ang American singer na si Finneas, ang umatras din sa tour ni Sheeran bilang pagpapakita ng suporta sa rapper.
