CAUAYAN CITY– Inaresto ng mga kasapi ng Dupax Del Norte Police Station sa Nueva Vizcaya ang isang magsasaka na No. 1 most wanted person provincial level sa kasong panggagahasa.
Ang akusado ay si Renato Diola, 40 anyos, magsasaka at residente ng Dupax Del Norte, Nueva Vizcaya dahil sa panggagahasa sa kanyang pamangkin.
Ang akusado ay inaresto sa bisa ng warrant of arrest na ipinalabas ni Judge Paul Attolba Jr. ng RTC Branch 30, Bayombong, Nueva Vizcaya sa kasong 9 counts of rape in relation to Republic Act 7610.
Hindi nakapagsumbong ang biktima dahil sa palaging pinagbabantaan ng akusado .
Nasa pangangalaga na ng Dupax Del Norte Police Station ang akusado na nakatakda namang ipasakamay sa Court of Origin.
Sa naging panayam ng Bombo Radyo Cauyan, inihayag ni PMajor Myla Paguyo, hepe ng Dupax Del Norte Police Station na pamangkin ng akusado ang biktima nito na noon ay 11 anyos pa lamang.
Habang nasa bukid ang magulang ng biktima ay pinagsasamantalahan ng akusado ang dalagita.
Nabuntis ang biktima at nang magtanong ang kanyang mga magulang ay doon lamang naglakas loob na ibunyag ang ginawang panggagahasa sa kanya ng tiyuhin.
Sinabi pa ng dalagita sa kanyang mga magulang na palaging pinagbabantaan siya ng akusado kaya hindi nakakapagsumbong.
