CAUAYAN CITY – Nananatiling mataas ang moral ng mga guro sa region 2 sa kabila ng pagpositibo sa COVID-19 ng 11 na pampublikong guro sa Lunsod ng Ilagan.
Sa naging panayam ng Bombo Radyo Cauayan, sinabi ni Project and Development Officer IV Ferdinand Narciso ng Department of Education (DepEd) region 2 na hindi naging hadlang sa isang guro sa Lunsod ng Ilagan ang pagpositibo niya sa COVID-19 para panghinaan ng loob.
Dahil isa siyang MAPEH teacher ay nagpa-zumba siya at hinikayat ang kanyang mga kasamang naka-quarantine na mag-ehersisyo para mapalakas ang kanilang katawan.
Dahil dito, humahanga siya dahil sa halip na panghinaan ng loob ay mas naging positibo ang mga naturang guro.
Gayunman ay nalulungkot sila dahil sa mga natatanggap nilang pagpuna subalit magsisilbi aniya itong hamon sa kanila para mas lalong mapabuti ang kanilang trabaho.
