Tiniyak ng ilang paaralan sa Lungsod ng Cauayan ang kanilang kahandaan para sa nalalapit na pagbubukas ng klase upang masiguro ang maayos, ligtas, at organisadong pagbabalik-eskwela ng mga mag-aaral.
Sa panayam ng Bombo Radyo Cauayan kay Ginoong Arthur Anog, Pangulo ng Teachers Association ng Cauayan North Central School, sinabi niya na puspusan na ang paghahanda ng mga guro at opisyal ng paaralan bago ang pagsisimula ng panibagong school year.
Kabilang sa mga isinasagawang paghahanda ang paglilinis ng mga silid-aralan, pagsasaayos ng mga kagamitan, at paghahanda ng mga learning materials na gagamitin ng mga estudyante sa kanilang pag-aaral.
Aniya, mahalaga ang maagang paghahanda upang matiyak na magiging komportable at maayos ang pag-aaral ng mga mag-aaral sa unang araw pa lamang ng klase.
Dagdag pa niya, nakikipag-ugnayan na rin ang mga paaralan sa mga magulang at iba’t ibang ahensya upang mapanatili ang kaligtasan at kaayusan sa loob at paligid ng mga eskwelahan.
Hinimok din ni Anog ang mga magulang na patuloy na suportahan at gabayan ang kanilang mga anak sa pagbabalik-eskwela upang maging mas magaan at epektibo ang kanilang pag-aaral.
Samantala, inaasahan ang pagdagsa ng libu-libong mag-aaral sa iba’t ibang pampubliko at pribadong paaralan sa lungsod sa pagsisimula ng panibagong school year.
