CAUAYAN CITY – Patuloy ang pakikipag-ugnayan ng National Meat Inspection Service (NMIS) region 2 sa mga Local Government Units (LGUs) sa rehiyon upang matiyak na ligtas ang mga karne na ibinebenta sa mga pamilihan
Sa naging panayam ng Bombo Radyo Cauayan inihayag ni Regional Technical Director Dr. Ronnie Ernst Duque ng NMIS region 2 na maganda ang kinalabasan ng kanilang pakikipag-usap sa mga LGU officials para ma-upgrade ang kanilang mga slaughter house.
Kailangan aniya na magkaroon din ng meat inspectors na magsusuri sa mga karne ng baboy na ibinebenta sa mga pamilihan.
Sinabi niya na batid ng mga local chief executives ang Food Safety Act na titiyak sa kaligtasan ng mga pagkain pangunahin na ang mga karne na ibinebenta.
Sinabi pa ni Dr. Duque na bagamat kulang sila ng mga tauhan sa NMIS region 2 ay umiikot pa rin sila upang matiyak na maipapatupad ang Food Safety Act at pinagtutuunan nila ng pansin ang meat safety.
Malaki rin aniya ang tulong ng pamahalaang local sa kanila upang matiyak na hindi infected ng African Swine Fever (ASF) ang mga karne ng baboy na ibinebenta.
Samantala, puspusan ang monitoring ng NMIS region 2 sa mga online sellers ng mga meat products.
Ayon kay Dr. Duque, mayroon na silang nadakip na online seller na expired meat ang ng ibinebenta.
Sinabi ni Dr. Duque na ang ginagawa ng online seller ay ibinababad sa suka, bawang at paminta ang expired nang karne na inirerepack sa isang kilo o half kilo na ibinebenta online at kapag niluto ay magiging lechon kawali.
Dahil dito binalaan ng NMIS region 2 ang mga mamimili na maging maingat sa pagbili online ng mga meat products at tiyakin na ang mga binibili ay may taglay na meat inspection permit.
