Nanawagan ang ilang mamamayan sa pamahalaan na masusing pag-aralan ang panukalang pagpapalawig ng termino ng mga opisyal ng barangay at Sangguniang Kabataan (SK) bago ito tuluyang maisabatas.
Sa panayam ng Bombo Radyo Cauayan kay Ginoong Camilo Bautista, sinabi niya na mahalagang timbangin ng mga mambabatas ang lahat ng posibleng epekto ng panukala upang matiyak na makabubuti ito sa mga mamamayan at sa sistema ng pamamahala sa mga barangay.
Ayon kay Bautista, dapat suriin kung makatutulong nga ba ang pagpapahaba ng termino sa pagpapatuloy ng mga programa at proyekto sa komunidad o kung maaari naman itong makaapekto sa karapatan ng mga botante na regular na makapili ng kanilang mga lider.
Ayon naman sa ilan, mahalagang marinig din ang saloobin ng iba’t ibang sektor, kabilang ang mga residente, opisyal ng barangay at mga kabataan, upang magkaroon ng mas malawak na konsultasyon bago magpasya ang pamahalaan sa naturang usapin.
Dagdag pa nila, bagama’t may mga nagsasabing makatutulong ang mas mahabang termino upang maipagpatuloy ang mga nasimulang programa at mabawasan ang gastusin sa pagsasagawa ng halalan, mayroon ding mga nangangambang maaaring mabawasan ang pananagutan ng mga opisyal sa kanilang mga nasasakupan.
Dahil dito, umaasa ang mga mamamayan na magsasagawa ang pamahalaan ng masusing pag-aaral at konsultasyon upang matiyak na ang anumang magiging desisyon ay tunay na magsusulong ng kapakanan ng mga mamamayan at ng mahusay na pamamahala sa mga barangay.
