Nagpatupad ng malawakang reshuffle ang Philippine National Police o PNP, kabilang ang pagpapalit ng ilang regional police director at paglilipat ng mga police general sa mahahalagang posisyon sa Camp Crame.
Batay sa mga reassignment order na may petsang Agosto 26, itinalaga si Brig. Gen. Randy Glenn Silvio bilang bagong director ng PRO-5 o Bicol, habang si Brig. Gen. Nestor Babagay Jr. naman ang mamumuno sa PRO-10 o Northern Mindanao. Epektibo ang kanilang assignment noong Agosto 27.
Siyam pang police generals ang may bagong assignment na epektibo ngayong Agosto 28.
Kabilang dito si Brig. Gen. Crisaleo Tolentino bilang bagong hepe ng PRO-1 o Ilocos Region, habang inilipat si dating director Brig. Gen. Jovencio Baduja Jr. sa Directorate for Police Community Relations.
Itinalaga rin si Brig. Gen. Elmer Ragay bilang director ng PRO-9 o Zamboanga Peninsula at si Brig. Gen. Rolindo Suguilon bilang hepe ng PRO-Caraga.
Si Brig. Gen. Noel Vallo naman ang bagong director ng PRO-Cordillera, habang inilipat si dating director Brig. Gen. Ericson Dilag sa Directorate for Information and Communications Technology Management.
Samantala, inilipat si dating PRO-Caraga director Brig. Gen. Marcial Mariano Magistrado IV sa Directorate for Comptrollership, si Brig. Gen. Jaime Cadatal sa Logistics Support Service at si Brig. Gen. Dennis Esguerra sa Directorate for Investigation and Detective Management.
Ang mga reassignment ay bahagi ng personnel movements sa ilalim ng pamumuno ni PNP chief Gen. Jose Melencio Nartatez Jr.
