Pinaiimbestigahan sa House Committee on Ethics and Privileges si Quezon City Rep. Jesus Suntay kaugnay ng kanyang pahayag kay Anne Curtis nang minsan nitong makita ang aktres sa isang Mall.
Sa sesyon ng plenaryo nitong Miyerkules, naghain ng mosyon si San Juan Rep. Ysabel Maria Zamora upang i-refer ang privilege speech ni House Committee on Women and Gender Equality chairperson at Laguna Rep. Ann Matibag sa Ethics committee.
Ang privilege speech ni Matibay ay kaugnay ng sinabi ni Suntay sa pagdinig ng House Committee on Justice sa impeachment complaints na inihain laban Vice President Sara Duterte.
“I move to authorize the Committee on Ethics and Privileges schedule a meeting to conduct a thorough assessment on the actuations and statements of Rep. Jesus “Bong” Suntay relative to the question of privilege of Rep. Ann Matibag,” sabi ni Zamora.
Sumunod na inihain ni Zamora ang mosyon upang paharapin si Suntay sa pagdinig ng Ethics panel at para magsumite ng report ang komite sa plenaryo ng resulta ng kanilang pagdinig at rekomendasyon.
Ang mga mosyon ni Zamora ay inapruhanan ni House Deputy Speaker at Iloilo Rep. Janette Garin, ang presiding officer ng sesyon, matapos na walang tumutol dito.
Humingi ng paumanhin si Suntay sa mga na-offend sa kanyang sinabi at iginiit na wala itong malisya. “My record on women’s welfare is real. The Gender and Development Code, at Bawal Bastos ordinance which I authored in Quezon City were not small achievements.”
