Pinayagan ng Sandiganbayan ang testimonya ng state witness na si Henry Alcantara sa kasong malversation na isinampa laban kay dating Ako Bicol party-list Representative Zaldy Co at 15 iba pa.
Ang kaso ay may kaugnayan sa umano’y maanomalyang P289-milyong flood control project sa Naujan, Oriental Mindoro.
Ipinagkaloob ng anti-graft court ang desisyon sa kabila ng pagtutol ng mga abogado ng siyam na dating opisyal ng Department of Public Works and Highways (DPWH) Region 4B, na iginiit na hindi umano mahalaga at hindi kaugnay ang testimonya ni Alcantara dahil wala ito sa naturang proyekto.
Gayunman, sinabi ni Sandiganbayan Associate Justice Kevin Vivero na bagama’t maaaring mukhang hindi direktang kaugnay ang ilang bahagi ng testimonya, dapat itong tingnan sa kabuuan.
Ayon kay Vivero, malinaw na may kinalaman ang testimonya ni Alcantara sa usapin ng umano’y “beneficial ownership” ni Co sa Sunwest Inc., ang kontratista ng naturang proyekto.
Si Co ay isa sa mga nagtatag ng Sunwest Inc., na siyang kumuha ng kontrata para sa nasabing flood control project.
Ang judicial affidavit ni Alcantara ay tinanggap bilang kanyang direct testimony sa korte.
Wala namang isinagawang cross-examination ang mga abogado ng depensa laban kay Alcantara.
Si Alcantara ay isa sa apat na state witnesses sa kaso, kabilang ang dating DPWH Undersecretary na si Roberto Bernardo.
Nauna nang tumestigo si Bernardo sa Sixth Division ng Sandiganbayan na umano’y tumanggap siya ng P100 milyong “balato” mula kay Co sa pamamagitan ni Alcantara.
Ayon pa kay Bernardo, ibinigay umano ang naturang halaga bilang bahagi o bahagi ng kita, dahil siya ang nagpakilala kay Alcantara bilang isang mapagkakatiwalaang tao para kay Co.
