CAUAYAN CITY – Inihatid na sa kanyang huling hantungan si Sangguniang Bayan member Michael Angelo Ramones.
Magugunitang nasawi si SB member Ramones sa isang aksidente na naganap sa Cabatuan, Isabela noong May 13, 2023.
Nasawi rin sa naturang aksidente si Barangay Peace Keeping Action Teams (BPATS) member Mario Acupan habang nasugatan si Barangay Kapitan Sonny Baysa ng Villa Gamiao, San Mateo, Isabela na mga kasama ni SB member Ramones.
Dinala ang kanyang labi sa munisipyo ng San Mateo at isinagawa ang isang programa bago dinala sa sementeryo ng naturang bayan.
Nagbigay naman ng eulogy ang kanyang mga kasamang opisyal ng pamahalaang lokal ng San Mateo.
Mayroon ding resolusyon na ibinigay sa kanyang pamilya na tinanggap ng kanyang maybahay na si Ginang Jennifer Ramones.
Si SB member Ramones ay unang nagsilbi na barangay kagawad ng Villa Magat, San Mateo, Isabela mula 2007 hanggang 2014 at naging barangay kapitan ng naturang barangay noong 2013 hanggang 2019.
Una siyang naging miyembro ng Sangguniang Bayan noong 2019 hanggang 2022 at muling nanalo noong nakaraang halalan.
