CAUAYAN CITY– Nadakip sa Baler, Aurora ang isang lalaki makalipas ang ilang taong pagtatago dahil sa kasong 2 counts of rape sa Alfonso Castañeda , Nueva Vizcaya.
Ang akusado ay si Wilfredo Dela Cruz alyas Kabong, 62 anyos, may-asawa, walang trabaho, pansamantalang naninirahan sa lalawigan ng Aurora.
Sa naging panayam ng Bombo Radyo Cauayan kay PLt. Joefrey Nool, OIC Chief Of Police ng Alfonso Castañeda Police Station kanyang inihayag na naging matagumpay ang pagkakadakip sa akusado sa pamamagitan ng inilatag na Manhunt Charlie na pinangunahan ng nasabing himpilan ng pulisya katuwang ang Baler Police Staton.
Ito ay matapos magbigay ng impormasyon ang isang concerned citizen sa pinagtataguang lugar ng akusado.
Sa bisa ng warrant of arrest ipinalabas ni Judge Jose Godofredo Naui ng RTC Branch 37, Bambang, Nueva Vizcaya na may 2 counts of rape ay inaresto ang akusado at walang inirekomendang piyansa para sa pansamantalang kalayaan.
Nagtrabaho at namalagi noong taong 2018 ang akusado sa bayan ng Alfonso Castañeda at naging malapit na kaibigan nito ang Ama ng biktima na noon ay 14 anyos pa lamang.
Isinakatuparan umano ng akusado ang dalawang beses na panggagahasa sa biktima sa mismong tahanan ng mga ito kapag nalalasing ang ama ng dalagita.
Dahil aniya sa pagbabanta at pagsuhol ng akusado sa biktima ay hindi kagad nakapagsumbong sa kaniyang ama at natuklasan lamang ang panggagahasa nang kaibigan sa anak ng mabuntis na.
