Umabot na sa 13 katao ang nasawi habang pito naman ang nawawala matapos ang matinding pag-ulan na tumama sa malaking bahagi ng Chile, ayon sa mga awtoridad.
Nagdulot ang mga bagyo ng malawakang pagbaha, pagkasira ng mga kalsada at kabahayan, at pagsasara ng ilang pangunahing daanan mula sa gitnang bahagi hanggang sa timog ng bansa.
Ayon kay Alicia Cebrian, pinuno ng Senapred emergency office ng Chile, nananatiling mataas ang panganib ng pagtaas ng lebel ng tubig sa mga ilog at sapa dahil sa paghina ng mga pampang bunsod ng ilang araw na tuloy-tuloy na pag-ulan.
Sa pinakahuling tala, nasa 2,281 katao ang lumikas mula sa kanilang mga tahanan, 81 bahay ang tuluyang nawasak at 2,761 iba pa ang nagtamo ng matinding pinsala. Mahigit 87,000 katao rin ang nananatiling walang suplay ng kuryente.
Dahil dito, inihayag ni Interior Minister Claudio Alvarado na magsasagawa ang pamahalaan ng kaukulang aksyon laban sa mga kumpanya ng distribusyon ng kuryente dahil sa mabagal na pagpapanumbalik ng serbisyo.
Sinuspinde rin ang klase sa ilang munisipalidad sa apat na rehiyon ng bansa dahil sa epekto ng masamang panahon.
Bagama’t hindi direktang naapektuhan ang karamihan sa mga minahan ng tanso at lithium sa hilagang bahagi ng Chile, napilitan pa ring bawasan ng ilang operasyon ang kanilang aktibidad dahil sa kondisyon ng panahon.
