Hindi bababa sa 21 katao ang nasawi matapos sumiklab ang isang malawakang sunog sa isang gusaling sa Malviya Nagar, Delhi, India nitong Miyerkules, ayon sa mga awtoridad.
Batay sa ulat ng Delhi Fire Services (DFS), natanggap nila ang tawag tungkol sa sunog dakong alas-9:45 ng umaga sa isang multi-storey building na pinatatakbo bilang Flourish Stay B&B. Agad na ipinadala sa lugar ang ilang fire truck at rescue teams upang tugunan ang insidente.
Mahigit 40 katao ang nailigtas mula sa gusali at isinugod sa mga kalapit na ospital sa pamamagitan ng mga ambulansiya ng CATS. Sa mga unang ulat, may ilang indibidwal ding nasagip mula sa basement ng gusali, ngunit kalaunan ay tumaas ang bilang ng mga nasawi.
Ayon sa paunang impormasyon, ilan sa mga biktima ay pinaniniwalaang mga dayuhan, subalit patuloy pa ang proseso ng pagkilala sa kanilang mga pagkakakilanlan. Hindi pa rin matiyak ng mga awtoridad ang eksaktong sanhi ng sunog dahil nagpapatuloy pa ang imbestigasyon.
Mabilis na rumesponde ang mga tauhan ng DFS, Delhi Police, Delhi Disaster Management Authority (DDMA), at iba pang disaster response units. Sinabi ng mga opisyal na posibleng nagsimula ang sunog sa restawran na matatagpuan sa ground floor ng gusali.
Patuloy ang imbestigasyon ng mga awtoridad upang matukoy ang sanhi ng sunog at mapanagot ang sinumang may pananagutan sa insidente.
