CAUAYAN CITY – Dinala sa Provincial Explosive and Ordnance Division and Canine Unit ang vintage bomb na wala ng pin na natagpuan sa kinukumpuning tulay sa Naguilian, Isabela.
Sa naging panayam ng Bombo Radyo Cauayan, inihayag ni PLt. Aldrin Galay, team leader ng Provincial EOD and Canine Unit na natuklasan ang vintage bomb ng isang grader operator sa ginagawang tulay sa bayan ng Naguillian.
Tumawag sa kanila ang hepe ng Naguillian Police Station na agad nilang tinugunan at nakita nila ang 81mm high explosives bomb na wala ng pin.
Sinabi ni PLt. Galay na napakadelikado kung sumabog ang bomba dahil may 5.4 kilometers effective range ito.
Dinala nila ito sa makeshift na imbakan sa Isabela Police Provincial Office at nakatakdang i-dispose.
Nanawagan siya sa publiko na kapag nakakita ng bomba ay huwag nilang hawakan at itawag agad sa kanilang tanggapan.
