Magiging abala ang Senado sa pagtalakay sa 2027 national budget kasabay ng pagtatapos ng ika-39 na araw ng impeachment trial ni Vice President Sara Duterte.
Ayon kay Senate President Sherwin Gatchalian, magpapatuloy ang regular na trabaho ng Senado kahit naka-session break dahil kailangan pa nilang asikasuhin at tapusin ang mga pagdinig kaugnay ng pambansang budget.
Aniya, may pasok ang mga senador hanggang Biyernes para sa mga nakatakdang budget hearing.
Kamakailan lamang ay inaprubahan ng Kamara ang panukalang ₱7.2-trilyong pambansang budget para sa 2027, na inaasahang isusumite sa Senado ngayong linggo.
Dahil sa pagkaantala ng iskedyul ng pag-apruba sa budget, posible ring hindi makapagbakasyon ang mga senador sa Disyembre.
Kabilang sa mga nakaapekto sa iskedyul ang mga pagbabago sa presentasyon ng depensa sa impeachment trial at ang nakatakdang 49th ASEAN Summit sa Nobyembre.
Ayon kay Gatchalian, katulad din ito ng nangyari noong nakaraang taon nang hindi nagkaroon ng Christmas break ang mga senador dahil kinailangan nilang magtipon upang pagtibayin ang pambansang budget at maipadala ito sa Pangulo para malagdaan bago matapos ang taon.
