Aminado si Justice Secretary Fredderick Vida na posibleng nasa Cambodia ang fugitive na negosyanteng si Charlie “Atong” Ang, kung saan iniulat na nagpapatakbo siya ng online sabong.
Ayon sa National Bureau of Investigation (NBI), halos araw-araw ay nakatatanggap sila ng bagong impormasyon tungkol sa kinaroroonan ni Ang. Sinabi rin ni Interior Secretary Jonvic Remulla na may posibilidad na nasa Cambodia o ilang bahagi ng Thailand si Ang dahil sa mga ulat tungkol sa kanyang sabong operations.
Iginiit naman ng Cambodian Ministry of Foreign Affairs and International Cooperation na walang tala ng presensya ni Ang sa kanilang bansa at tinanggi ang ulat na nagtatago siya roon.
Sa kabila nito, sinabi ni Vida na sa larangan ng posibilidad, lahat ay maaaring mangyari kung may sapat na resources. Naniniwala ang Department of Justice na malamang ay nasa Pilipinas pa rin si Ang, base sa pahayag ng Bureau of Immigration na walang record ng kanyang pag-alis sa bansa.
Ani Vida, habang wala sa formal channels ang ebidensya na nasa ibang bansa si Ang, may ilang intelligence reports na nagsasabing posibleng naroroon pa rin siya.
Patuloy ang mga awtoridad sa kanilang pagsisikap na mahuli si Ang, na wanted sa kasong multiple kidnapping with homicide, pati na sa kidnapping at serious illegal detention kaugnay ng mga nawawalang sabungero. Gayunpaman, aminado si Vida na mahirap tukuyin kung kailan ito mahuhuli, maaaring malapit o malayo, ngunit hindi tiyak ang eksaktong panahon.
