Arestado ang isang 25-anyos na lalaki matapos masangkot sa kaso ng cattle rustling o pagnanakaw ng baka sa Santiago City.
Kinilala ng pulisya ang suspek sa alyas na “Jayson,” walang trabaho at residente ng Brgy. Calaocan, Santiago City.
Batay sa impormasyong nakalap ng Bombo Radyo Cauayan mula sa Police Station 3, bandang alas-12:30 ng madaling araw nitong Abril 17 ay agad na nag-ulat sa mga awtoridad ang isang concerned citizen kaugnay ng pagkawala ng isang baka na pagmamay-ari ng isang 50-anyos na magsasaka mula sa Brgy. Balintocatoc.
Lumalabas sa paunang imbestigasyon na may namataang sasakyan na umano’y “kulong-kulong” na may kargang hayop na kahalintulad ng nawawalang baka, dahilan upang magdulot ng hinala sa posibleng pagnanakaw.
Dahil dito, agarang naglunsad ng hot pursuit operation ang mga tauhan ng pulisya, katuwang ang mismong may-ari ng naturang baka, upang matunton ang kinaroroonan ng sasakyan at hinihinalang suspek.
Bandang alas-1:10 ng madaling araw, naaktuhan ang suspek habang binabagtas ang kahabaan ng Santiago–Saguday Road sa Purok 1, Brgy. Balaurte. Doon ay natagpuan din ang hinihinalang ninakaw na baka.
Agad na inaresto ang suspek matapos ipabatid sa kanya ang kanyang mga karapatang konstitusyonal, habang positibong kinilala ng may-ari ang nabawi na hayop bilang kanyang pag-aari.
Sa kasalukuyan, nasa kustodiya na ng pulisya ang suspek at ang ginamit na sasakyan bilang ebidensya.
Inihahanda na ng mga awtoridad ang pagsasampa ng kasong paglabag sa Presidential Decree 533 o Anti-Cattle Rustling Law laban sa suspek sa piskalya.
