Nag-ulat ng malalaking kita ang ilang pangunahing kumpanya ng langis at gas sa Europa sa unang kwarter ng taon kasabay ng pagtaas ng presyo ng enerhiya dahil sa tensyon sa Gitnang Silangan, na patuloy na binabantayan dahil sa posibleng epekto nito sa pandaigdigang presyo ng langis.
Ayon sa ulat, ang Shell ay nagtala ng halos $5.7 bilyong net profit, mas mataas ng 19 porsyento kumpara sa parehong panahon noong nakaraang taon. Iniulat ng kumpanya na nakinabang ito sa mas mataas na presyo ng langis at mas malakas na kita mula sa refinery at trading operations.
Iniulat din ng BP ang pagtaas ng kita na umabot sa $3.84 bilyon, habang ang TotalEnergies ay nakapagtala ng 51 porsyentong pagtaas ng kita na umabot sa $5.8 bilyon.
Samantala, bahagyang bumaba ang kita ng mga kumpanyang Amerikano tulad ng ExxonMobil at Chevron dahil sa epekto ng galaw sa derivatives markets at timing ng pagbebenta ng produkto.
Ayon sa ulat, tumaas ang presyo ng langis matapos maapektuhan ang suplay sa Strait of Hormuz dahil sa tensyon sa Gitnang Silangan. Umabot sa humigit-kumulang $100 kada bariles ang Brent crude noong Marso, mas mataas kumpara sa $70 bago ang krisis.
Patuloy na binabantayan ng mga analyst ang galaw ng presyo ng langis dahil sa epekto nito sa pandaigdigang merkado at sa mga bansang umaasa sa imported fuel.
