Madi Mojdeh, pasok sa Philippine junior team para sa SEA Age Championships

Pasok sa national junior swimming team si Behrouz Mohammad “Madi” Mojdeh matapos makuha ang qualifying time para sa 48th Southeast Asian Age-Group Championships na gaganapin sa Kuala Lumpur, Malaysia.

Nakuha ni Mojdeh ang QT-B sa boys’ 14-15 200m butterfly event matapos magtala ng oras na 2:11.28 sa PAI National Age-Group Championships sa New Clark City Aquatics Center.

Bukod dito, humakot siya ng apat na gintong medalya sa 200m butterfly, 100m butterfly, 400m individual medley, at 50m butterfly, pati isang pilak sa 200m individual medley.

Ipinahayag ni Mojdeh ang kanyang determinasyong mas pagbutihin pa ang kanyang ensayo upang makapagbigay ng karangalan sa bansa sa nalalapit na international competition.