Pinapalakas ng Pilipinas ang posisyon nito sa lumalaking pandaigdigang merkado ng ube matapos ihain ng Bohol ang aplikasyon para sa geographical indication (GI) registration ng Ubi Kinampay, habang isinusulong ng gobyerno ang pagpapalawak ng produksyon at pag-eksport ng produktong tinaguriang “purple gold.”
Ayon sa Intellectual Property Office of the Philippines (IPOPHL), layunin ng GI registration na protektahan ang reputasyon at pagkakakilanlan ng Bohol Ubi Kinampay. Ito ang magiging ikalimang rehistradong geographical indication sa bansa at ikalawang produkto ng Bohol matapos ang Asin Tibuok.
Kasabay nito, pinalalakas ng Department of Agriculture (DA) ang industriya ng ube upang mapakinabangan ang tumataas na demand sa ibang bansa. Umabot sa $3.06 milyon ang halaga ng ube exports ng Pilipinas noong 2025, higit doble kumpara sa $1.4 milyon noong 2024. Kabilang sa mga pangunahing merkado ang Canada, Middle East at iba pang bahagi ng Asya, habang nakikitang susunod na paglago ang Estados Unidos, South Korea at Europa.
Gayunman, nananatiling hamon ang suplay dahil bumaba ng 6.7 % ang produksyon ng ube sa bansa sa 12,483.31 metric tons noong 2025. Upang tugunan ito, namahagi ang Bureau of Plant Industry ng mahigit 60,000 ube planting materials na nagkakahalaga ng halos P2.6 milyon sa mahigit 900 magsasaka sa Leyte at Bohol. Ayon sa DA, maaaring tumaas mula 50 hanggang 60 metric tons tungo sa 500 metric tons ang produksyon kada operator kung mapapabuti ang supply chain, access sa planting materials at processing facilities.
