Sumiklab ang malaking sunog sa isang oil-loading terminal sa Rostov-on-Don, sa katimugang bahagi ng Russia, kasunod ng iniulat na pag-atake ng mga Ukrainian drone noong gabi ng Oktubre 9 hanggang 10.
Ang naturang pasilidad ay konektado sa Novoshakhtinsk oil refinery at ginagamit sa paghawak at pagpapadala ng mga produktong petrolyo at suplay ng langis para sa export.
Sa mga kumakalat na video online, makikita ang naglalakihang apoy at makapal na usok na nagmumula sa lugar ng terminal.
Naganap ang insidente ilang oras matapos ianunsiyo ni U.S. President Donald Trump ang napagkasunduang pagpapagaan ng mga restriksiyon sa export ng diesel ng Russia, kasunod ng pakikipag-usap niya kay Russian President Vladimir Putin. Inaasahan umanong magdaragdag ang Moscow ng suplay ng diesel sa pandaigdigang merkado.
Patuloy naman ang mga pag-atake ng Ukraine sa mga pasilidad ng enerhiya ng Russia, sa layuning guluhin ang mga imprastrakturang pinagkukunan ng kita at sumusuporta sa operasyon ng Moscow sa digmaan.
Patuloy pang tinataya ang lawak ng pinsala sa oil-loading terminal. Wala pang malinaw na detalye hinggil sa posibleng mga nasugatan o iba pang epekto ng sunog.
