Pansamantalang hindi muna ipatutupad ang suspensiyon laban kina Senators Rodante Marcoleta at Jinggoy Estrada habang hinihintay ang pinal na resolusyon sa kanilang mga mosyon para sa muling pagsasaalang-alang o motion for reconsideration.
Ayon kay Senate President Sherwin Gatchalian nitong Linggo, Oktubre 25, kinumpirma niyang natanggap na ng Senado ang mga kautusan ng Sandiganbayan na nagsususpinde sa dalawang senador.
Sinabi ni Gatchalian na nakatanggap din siya ng mga liham mula kina Estrada at Marcoleta na humihiling na pansamantalang ipagpaliban ang pagpapatupad ng kanilang suspensiyon dahil inaasahang magsasampa ang mga ito ng mosyon para sa muling pagsasaalang-alang.
Paliwanag ni Gatchalian, hindi muna ipatutupad ang suspensiyon habang hindi pa pinal ang resolusyon sa naturang mga mosyon.
Nauna nang iniutos ng Fifth Division ng Sandiganbayan ang 90-araw na preventive suspension kay Estrada kaugnay ng kinakaharap niyang mga kasong pandarambong at katiwalian na may kaugnayan sa umano’y pagkakasangkot niya sa kontrobersiya sa mga proyekto ng flood control.
Ito na ang ikalawang 90-araw na preventive suspension na ipinataw kay Estrada. Noong Hunyo, naglabas din ng kaparehong kautusan ang Second Division ng anti-graft court kaugnay ng hiwalay na mga kasong katiwalian laban sa senador.
Samantala, iniutos naman ng Third Division ng Sandiganbayan ang 90-araw na preventive suspension kay Marcoleta kaugnay ng kasong pandarambong na may kinalaman sa umano’y hindi pagdedeklara ng halagang ₱75 milyon na kontribusyon sa kampanya.
Dagdag pa ni Gatchalian, hindi rin tumatanggap ng sahod sina Marcoleta at Estrada, gayundin si Senator Loren Legarda, dahil sa kanilang pagliban sa trabaho.
Samantala, nauna nang sinabi ni Ombudsman Jesus Crispin Remulla na inaasahang maisasampa sa lalong madaling panahon ang mga kasong kriminal laban kay Legarda at Batangas Representative Leandro Leviste kaugnay ng umano’y kabiguang maihatid ng kompanya ng solar energy ni Leviste ang kinontratang suplay ng kuryente.
