Nanawagan ang mga opisyal ng barangay sa mga residente na maging responsable sa pag-aalaga ng kanilang mga alagang hayop, partikular na ang mga aso at pusa, upang maiwasan ang pananakit at pagkasira ng ari-arian na dulot ng mga hayop na malayang gumagala sa komunidad.
Sa panayam ng Bombo Radyo Cauayan kay Punong Barangay Quinton Romero ng Brgy. Calaocan, mayroon nang umiiral na mga kaukulang parusa para sa mga may-ari ng hayop na nagdudulot ng pinsala. Gayunman, madalas umanong nakikipagtulungan ang mga may-ari sa mga naapektuhan upang maresolba ang mga insidente.
Sa kabila nito, inamin ng opisyal na nananatiling malaking hamon ang pagpapatupad ng mga regulasyon dahil sa kakulangan ng tauhan. Aniya, hindi biro ang panghuhuli ng mga ligaw at agresibong hayop dahil nangangailangan ito ng sapat na pagsasanay at kagamitan upang matiyak ang kaligtasan ng mga tauhan at ng mga hayop.
Binanggit din ng barangay ang pangangailangan ng isang lokal na ordinansa na magbibigay ng kapangyarihan sa mga awtoridad na manghuli at mag-impound ng mga hayop na pagala-gala sa mga lansangan. Sa kasalukuyan, wala pa umanong ganitong ordinansa sa kanilang nasasakupan.
Dahil dito, nananatiling suliranin sa komunidad ang pagdami ng mga hayop na malayang gumagala. Umaasa ang barangay na sa pamamagitan ng mas mahigpit na regulasyon, karagdagang tauhan, at pagsasanay para sa mga manghuhuli ng hayop ay mas mapapabuti ang pagpapatupad ng mga hakbang para sa kaligtasan at kaayusan ng publiko.
