Pabibilisin ng Commission on Higher Education (CHED) ang pagpapalabas ng P764 milyong student financial assistance para sa mahigit 66,000 benepisyaryo sa Region XII bilang tugon sa pagbangon ng rehiyon mula sa magnitude 7.8 na lindol na tumama sa katimugang Mindanao.
Sa inilabas na pahayag ng CHED nitong Miyerkules, sinabi nitong ipamamahagi ang pondo sa ilalim ng Tertiary Education Subsidy (TES) program at makikinabang dito ang 66,655 estudyante sa Region XII para sa ikalawang semestre ng Academic Year 2025–2026.
Ayon sa komisyon, bahagi ang nasabing ayuda ng patuloy na pagsisikap ng pamahalaan upang suportahan ang mga estudyante at kanilang mga pamilya sa mga lugar na naapektuhan ng lindol, kabilang ang General Santos City at mga lalawigan ng Sarangani, South Cotabato, Davao Occidental, at Davao del Sur.
Noong Hunyo 13, nagtungo si CHED Chairperson Shirley Agrupis sa Region XII upang personal na pangasiwaan ang pamamahagi ng TES assistance sa 808 benepisyaryo sa General Santos City, Tacurong City, Koronadal City, at bayan ng Polomolok.
Dagdag pa ng ahensya, nakatanggap din ng tulong ang karagdagang 501 benepisyaryo mula sa iba pang bahagi ng rehiyon sa isinagawang distribusyon.
Sinabi ng CHED na ang pinakahuling pagpapalabas ng pondo ay kasunod ng naunang distribusyon ng P2.02 bilyong halaga ng mga grant sa ilalim ng TES at Tulong Dunong Program noong Abril at Mayo 2026.
Ayon pa sa komisyon, pinaigting nito ang mga hakbang upang mabawasan ang mga naantalang pagpapalabas ng student financial assistance at mapahusay ang implementasyon ng mga programa sa ilalim ng Universal Access to Quality Tertiary Education Act.
Kabilang sa mga repormang isinagawa ng CHED ang pakikipagtulungan sa Land Bank of the Philippines upang mapabilis ang distribusyon ng mga subsidiya, gayundin ang pagrebisa sa mga patakaran ng TES at Tulong Dunong Program para mas mapadali ang paghahatid ng ayuda sa mga estudyante.
Binigyang-diin ng CHED na nananatili itong nakatuon sa pagpapabilis ng pagpapalabas ng mga grant at programang pinansyal para sa mga mag-aaral sa kolehiyo, lalo na sa mga komunidad na patuloy na bumabangon mula sa pinsalang dulot ng kamakailang lindol.
