Magsasagawa ang Land Transportation Franchising and Regulatory Board (LTFRB) ng pormal na pagdinig bukas araw ng Lunes, Agosto 3, alas-9 ng umaga upang talakayin at suriin ang mga nakabinbing petisyon para sa taas-pasahe na inihain ng ilang transport groups.
Ayon kay LTFRB Chairman Vigor Mendoza II, muling kakalkulahin ng ahensya ang mga hinihinging dagdag-pasahe alinsunod sa direktiba ni Transportation Secretary Giovanni Lopez hinggil sa mga pamasahe sa pampublikong transportasyon.
Ilang transport groups ang naghain ng mga petisyon para sa taas-pasahe mula Marso hanggang Hulyo dahil sa patuloy na pagtaas ng presyo ng langis na dulot ng mga tensyon at kaguluhan sa Middle East.
Sa kasalukuyan, nasa P13 ang minimum na pasahe para sa mga pampasaherong jeepney na bumibiyahe sa mga national route.
Kabilang sa mga naghain ng petisyon ang transport group na Manibela na humihiling ng P2 dagdag sa minimum na pasahe ng mga jeepney.
Samantala, naghain naman ang transport group na PISTON ng hiwalay na petisyon para sa P10 na dagdag sa minimum na pasahe.
Sasaklawin din ng nakatakdang pagdinig ang mga kahilingan para sa fare adjustment ng UV Express, mga air-conditioned taxi, at motorcycle taxi operators.
Ayon kay Mendoza, layunin ng LTFRB na makabuo ng mga hakbang na magiging katanggap-tanggap hindi lamang sa sektor ng pampublikong transportasyon kundi maging sa mga commuter at iba pang apektadong sektor.
Inimbitahan din ng LTFRB ang iba pang transport organizations, mga ahensya ng gobyerno, at consumer groups upang magsumite ng ebidensya at kanilang posisyon sa isasagawang pagdinig.
Maaaring magsumite ang mga interesadong partido ng kanilang position papers at iba pang kaukulang dokumento bago ang pagdinig.
Nilinaw ni Mendoza na layunin ng pagdinig na pakinggan ang mga ebidensya, komento, at posisyon ng lahat ng sektor na may kaugnayan sa mga nakabinbing petisyon para sa taas-pasahe.
Tiniyak naman ng LTFRB na daraan sa wastong proseso ang lahat ng pagtutol at komento kaugnay ng mga panukalang dagdag-pasahe sa pagdinig sa Agosto 3.
