Nagkaroon ng pagbabago sa pamumuno ng ilang komite sa Senado kasunod ng pagkakabuo ng bagong majority bloc sa ilalim ni Senate President Alan Peter Cayetano.
Kabilang sa mga naapektuhan si Sen. Risa Hontiveros na nawalan ng chairmanship ng Senate Committee on Health and Demography. Muling ibinigay ang naturang komite kay Sen. Christopher ‘Bong’ Go na dati nang namuno rito. Napanatili rin ni Go ang pamumuno sa Senate Committee on Sports.
Itinalaga naman si Sen. Loren Legarda bilang bagong chairperson ng Senate Committee on Basic Education na dating pinamumunuan ni Sen. Bam Aquino. Nanatili rin kay Legarda ang Committee on Culture and the Arts.
Samantala, tinanggal kay Sen. Erwin Tulfo ang chairmanship ng Senate Committee on Games and Amusement na ngayon ay hawak na ni Sen. Jinggoy Estrada. Si Estrada rin ang mamumuno sa Senate Committee on National Defense and Security.
Nawala rin kay Sen. Raffy Tulfo ang chairmanship ng Senate Committee on Public Services na inilipat kay Sen. Rodante Marcoleta.
Itinalaga naman si Sen. Joel Villanueva bilang chairperson ng Senate Committee on Higher, Technical, and Vocational Education.
Nanatili naman kay Sen. Pia Cayetano ang pamumuno sa Senate Committees on Ways and Means at Sustainable Development Goals, Innovation, and Futures Thinking.
Habang napanatili rin ni Sen. Robinhood Padilla ang chairmanship ng Senate Committees on Cultural Communities and Muslim Affairs at Public Information and Mass Media.
