Naghihintay ang Iran sa opisyal na tugon ng Estados Unidos sa panukalang muling buksan ang Strait of Hormuz at itigil ang labanan sa Middle East.
Inihain ng Iran ang panukala sa United Nations General Assembly at ipinadala umano ito sa US sa pamamagitan ng mga mediator mula Qatar. Sa ilalim nito, maaaring muling buksan ang estratehikong daanan at magkaroon ng tigil-putukan sa rehiyon sa loob ng pitong araw.
Ayon kay Iranian Foreign Minister Abbas Araqchi, handa na umano ang kanilang panig para sa kasunduan kung seryoso ang US sa negosasyon.
Kapalit nito, hinihingi ng Iran ang pagtanggal ng US blockade sa kanilang mga pantalan, pagpapalaya sa mga nakapirmang pondo at pag-alis ng oil sanctions.
Samantala, iniulat ng Wall Street Journal na tinanggihan umano ni US President Donald Trump ang panukala at nakikitang posibleng muling magsagawa ng pambobomba laban sa Iran. Hindi pa ito agad nakumpirma ng Reuters.
Patuloy namang naaapektuhan ng labanan ang daloy ng langis sa Strait of Hormuz, isa sa pinakamahalagang shipping routes sa mundo.
