Mahigit 600 musikero ang nagsama-sama sa Queensland, Australia upang tumugtog ng trombone nang sabay-sabay at magtangkang magtala ng bagong Guinness World Record para sa pinakamalaking trombone ensemble.
Isinagawa ang pagtatangka bilang bahagi ng SPARK Ipswich Arts Festival, kung saan sabay-sabay na itinanghal ng mga kalahok ang kantang “76 Trombones” mula sa musical na The Music Man.
Kabilang sa mga lumahok ang mga mag-aaral, miyembro ng mga banda at orkestra mula sa iba’t ibang bahagi ng Queensland at iba pang lugar sa Australia.
Ayon kay Ipswich Mayor Teresa Harding, isusumite na sa Guinness World Records ang mga ebidensya mula sa pagtatangka para sa opisyal na beripikasyon.
Kung mapapatunayan, malalampasan nito ang kasalukuyang rekord na 368 trombone players na naitala sa Washington, D.C. noong 2012.
