Nanawagan ang Philippine Red Cross Santiago City Chapter sa publiko na mag-donate ng dugo matapos makaranas ng kakulangan ng supply ng dugo sa lungsod.
Sa panayam ng Bombo Radyo Cauayan kay Ginoong Jhun Pablo Durias, Officer-in-Charge ng Philippine Red Cross Santiago City Chapter, kasalukuyang limitado ang stocks ng dugo, pati na rin ang bilang ng mga nagdo-donate nito, kung kaya’t patuloy ang kanilang panawagan sa mga kwalipikadong indibidwal na magbigay ng donasyon.
Dagdag ni Durias, bukas ang Red Cross sa pagtanggap ng blood donors mula Lunes hanggang Biyernes, at maaaring dumalaw ang mga nais mag-donate sa kanilang tanggapan sa lungsod ng Santiago.
Sa ngayon, may apatnapu’t tatlong units ng screened blood na bagong dating at handa nang gamitin para sa mga pasyenteng nangangailangan. Gayunman, iginiit ng Red Cross na kinakailangan pa rin ang tuloy-tuloy na donasyon upang matugunan ang pangangailangan ng mga ospital at pasyente.
Patuloy naman ang paanyaya ng Philippine Red Cross sa lahat ng qualified blood donors na maglaan ng oras upang makatulong sa pagsalba ng buhay.
