Nanawagan si Defense Secretary Gilberto “Gibo” Teodoro Jr. kay dating senador Antonio Trillanes IV na isumite sa mga awtoridad ang anumang ebidensyang may kaugnayan sa alegasyon nitong tumanggap ng pondong mula sa China si Vice President Sara Duterte at ang asawa nitong si Manases “Mans” Carpio.
Sinabi ni Teodoro na kung mapatutunayan ang mga alegasyon, maaari itong magkaroon ng seryosong implikasyon sa national security kaya nararapat lamang na masusing imbestigahan ng mga law enforcement agency ang usapin.
Matatandaang inihayag ni Trillanes na umano’y may daan-daang milyong pisong pondo mula sa mga entidad na konektado sa China na napunta sa isang foundation na iniuugnay kay Duterte at sa isang kumpanyang may kaugnayan kay Carpio.
Samantala, mariing itinanggi ng kampo ni Vice President Duterte ang mga paratang at tinawag itong mga gawa-gawang alegasyon. Ayon sa tagapagsalita ng bise presidente na si Salvador Paolo Panelo Jr., walang katotohanan ang mga akusasyon at handa silang sagutin ang mga ito sa tamang proseso.
Sa ngayon, wala pang inilalabas na pinal na findings ang mga awtoridad kaugnay ng naturang mga alegasyon at nananatiling paksa ito ng pampublikong usapin at pagsusuri.
