Itinanggi ni Senate Secretary Renato Bantug Jr. nitong Biyernes na may tensyon sa unang araw ng pre-trial conference kaugnay ng impeachment case laban kay Vice President Sara Duterte.
Ayon kay Bantug, na nagsisilbi ring clerk ng Senate impeachment court, naging maayos at produktibo ang unang yugto ng pre-trial at walang anumang hindi pangkaraniwang pangyayari sa proseso.
Aniya, may ilang “exciting moments” at palitan ng argumento sa pagitan ng mga abogado, ngunit normal lamang ito sa ganitong uri ng pagdinig.
Dagdag pa niya, karaniwan ang ganitong palitan lalo na sa pagitan ng magkabilang panig sa isang conference, at hindi ito maituturing na seryosong alitan.
Noong Huwebes, sinimulan ang pre-trial conference sa Senado na dinaluhan ng mga abogado ng kampo ni Vice President Sara Duterte at ng House prosecutors. Ayon sa kanyang defense counsel na si Michael Poa, natapos na nilang markahan ang ilang documentary evidence para sa Articles III at IV, at ipagpapatuloy pa ito sa mga susunod na bahagi.
Ipinaliwanag din ni Bantug na normal ang ganitong proseso dahil sa dami ng ebidensyang kailangang isaayos at i-markahan, at hindi ito indikasyon ng anumang sigalot sa pagitan ng dalawang panig.
Inaasahang maglalabas ang impeachment court secretariat ng pre-trial order na magsisilbing buod ng mga napag-usapan sa pagdinig.
Ang pre-trial conference ay bahagi ng paghahanda bago pormal na magtipon ang senator-judges bilang impeachment court sa Hulyo 6.
Si VP Duterte ay na-impeach noong Mayo dahil sa mga kasong kabilang ang culpable violation of the Constitution, graft and corruption, betrayal of public trust, bribery, at iba pang high crimes.
