Muling ipinakita ng magkapatid na sina Carlos Yulo at Karl Eldrew Yulo ang kanilang husay matapos masungkit ang dalawang puwesto sa podium ng men’s floor exercise event sa 2026 Asian Gymnastics Championships noong Sabado sa Zunyi, China.
Pinangunahan ni Carlos ang kompetisyon matapos magtala ng kahanga-hangang 14.700 puntos upang maiuwi ang gintong medalya. Samantala, nakasungkit naman ng tansong medalya ang kanyang nakababatang kapatid na si Eldrew matapos makakuha ng 14.300 puntos.
Nakuha naman ng Japanese gymnast na si Shoma Tsukiyama ang pilak na medalya upang kumpletuhin ang hanay ng mga medalista sa naturang event.
Bago ang finals, kapwa nagpakitang-gilas ang magkapatid sa qualification round. Nanguna si Carlos sa lahat ng kalahok matapos umiskor ng 14.433 puntos, habang nagtapos si Eldrew sa ikawalong puwesto sa pamamagitan ng 13.600 puntos, sapat upang makapasok sa finals.
Hindi lamang sa floor exercise umangat ang magkapatid na Yulo. Nakapagkuwalipika rin sila sa horizontal bar finals, habang sasabak pa si Carlos sa parallel bars finals, na nagbibigay sa kanya ng pagkakataong makadagdag pa ng medalya para sa Pilipinas.
Ang panibagong tagumpay ng magkapatid na Yulo ay patunay ng patuloy na paglakas ng gymnastics ng bansa sa pandaigdigang entablado at nagbigay muli ng karangalan sa Pilipinas sa prestihiyosong torneo sa Asya.
