Ligtas na nakabalik sa Pilipinas nitong Sabado, Mayo 16 ang 34 na overseas Filipino workers (OFWs) at isang dependent mula Qatar sa ilalim ng repatriation program ng pamahalaan para sa mga Pilipinong apektado ng tumitinding tensyon sa ilang bahagi ng Middle East.
Dumating ang grupo sa Ninoy Aquino International Airport (NAIA) Terminal 3 sa Pasay City sakay ng Qatar Airways Flight QR934, ayon sa Department of Migrant Workers (DMW).
Sinalubong sila ng mga kinatawan mula sa DMW, Overseas Workers Welfare Administration (OWWA), mga medical personnel ng Manila International Airport Authority (MIAA), at New NAIA Infrastructure Corporation na agad nagbigay ng kinakailangang tulong pagdating nila sa bansa.
Ayon sa mga awtoridad, sumailalim sa assessment at tulong ang mga repatriated workers upang matiyak ang maayos nilang pagbabalik at pag-transition sa Pilipinas.
Patuloy namang mino-monitor ng pamahalaan ang sitwasyon sa Middle East kung saan ang tumitinding tensyon at instability ay nag-udyok sa ilang OFW na humiling ng tulong upang makauwi sa bansa.
Nauna nang iniulat ng DMW ang pagdami ng mga kahilingang repatriation mula sa mga Pilipino sa mga apektadong lugar, dahilan upang i-activate ang contingency measures para sa posibleng mas malawakang evacuation.
Tiniyak ni DMW Secretary Hans Leo Cacdac na handa ang pamahalaan sa anumang posibleng paglala ng sitwasyon, kabilang ang mga pre-arranged evacuation route, designated assembly points, at koordinasyon sa transportasyon para sa ligtas na pag-uwi ng mga OFW.
Sinabi rin ng DMW na handa silang palawakin pa ang repatriation operations kung kinakailangan.
Ayon sa datos ng pamahalaan, libu-libong OFW mula sa iba’t ibang bansa sa Middle East ang nakauwi na sa Pilipinas mula Marso sa ilalim ng state-assisted repatriation efforts.
Sa ilalim ng post-repatriation assistance program, binigyan ang mga bumalik na OFW ng medical assistance, financial aid, pansamantalang matutuluyan, at transportasyon pabalik sa kanilang mga lalawigan.
Mayroon ding mga reintegration program tulad ng livelihood support, employment assistance, at skills training upang matulungan silang makapagbalik sa normal na pamumuhay sa kanilang mga komunidad.
Ayon sa DMW, bahagi ang hakbang na ito ng patuloy na programa ng administrasyon sa ilalim ng direktiba ni Pangulong Ferdinand Marcos Jr. para sa proteksyon at kapakanan ng mga overseas Filipino workers.
