Mahigit 7,300 personnel mula sa iba’t ibang ahensya ng gobyerno ang idineploy upang tiyakin ang seguridad at emergency response para sa ika-48 ASEAN Leaders’ Summit na gaganapin mula Mayo 7 hanggang 8, 2026 sa Cebu.
Pinangunahan ni PGen. Jose Melencio Nartatez Jr., hepe ng Philippine National Police (PNP), ang paglulunsad ng deployment nitong Sabado at nagsagawa rin siya ng aerial at onsite inspections sa mahahalagang lugar sa Central Visayas.
Layunin ng mga inspeksyong ito na suriin ang kahandaan ng operasyon, tiyakin ang maayos na implementasyon ng deployment plans, at patatagin ang koordinasyon ng mga pwersa ng seguridad sa mga kritikal na lugar tulad ng event venues, transport routes, at iba pang pangunahing lokasyon.
Kabilang sa Task Group Central Visayas ang PNP, Armed Forces of the Philippines, Bureau of Fire Protection, Philippine Coast Guard, Department of Health, at Office of Civil Defense, kasama ang iba pang ahensya ng gobyerno. Saklaw ng kanilang operasyon ang seguridad sa mga venue, proteksyon sa convoy ng mga delegado, pagbabantay sa karagatan at himpapawid, pamamahala ng trapiko, serbisyong medikal sa emerhensiya, at agarang pagtugon sa anumang insidente.
Inaasahang darating ang mga dayuhang delegado simula Mayo 5 at mananatili hanggang Mayo 12.
