Kinumpirma ng Department of Foreign Affairs (DFA) na pinalaya na ang 78 Pilipino na naging biktima ng human trafficking sa Myanmar at napilitang magtrabaho sa mga tinaguriang scam centers.
Ayon sa DFA, ang mga nasabing Pilipino ay dati ring nakulong dahil sa mga kasong may kinalaman sa immigration, kabilang ang illegal entry at pananatili sa bansa.
Sa kasalukuyan, nakikipag-ugnayan ang Philippine Embassy sa Yangon sa mga awtoridad ng Myanmar upang matiyak ang mabilis, ligtas, at maayos na repatriation ng mga biktima pabalik sa Pilipinas.
Nagpasalamat naman ang DFA sa pamahalaan ng Myanmar sa kanilang makatao at mahabaging hakbang, na isinabay sa pagdiriwang ng Myanmar New Year o Thingyan. Ayon sa ahensya, patunay ito ng maayos at matibay na ugnayan ng Pilipinas at Myanmar.
Noong 2025, nakapagpauwi ang Department of Migrant Workers (DMW) ng kabuuang 839 Pilipino mula Myanmar, kung saan 690 sa kanila ang nabigyan ng tulong pangkabuhayan at pangkapakanan.
Patuloy ding nagbabantay ang DMW laban sa illegal recruitment, lalo na sa mga online posting na nag-aalok ng pekeng package tours at trabaho sa Thailand, Cambodia, Laos, at Myanmar.
Sa tala ng ahensya, mahigit 200 Pilipino na nasa Myanmar ang humingi na ng tulong para sa repatriation, habang tinatayang 17,000 online posts na may kaugnayan sa illegal recruitment at pekeng job offers ang naipababa mula sa internet.
