Inanunsyo ng militar ng Estados Unidos na nagsagawa ito ng tatlong airstrike laban sa mga hinihinalang sasakyang-dagat na sangkot sa drug trafficking sa Karagatang Pasipiko at Dagat Caribbean, na ikinasawi ng hindi bababa sa 11 katao.
Ayon sa US Southern Command (SOUTHCOM), na nangangasiwa sa mga operasyong militar ng US sa Latin America, dalawang pag-atake ang isinagawa sa Silangang Pasipiko at isa sa Caribbean bilang bahagi ng kampanyang tinawag na Operation Southern Spear.
Ang administrasyon ni Donald Trump ay nagsasagawa ng mga pag-atake laban sa mga hinihinalang drug-trafficking boats sa katubigan malapit sa Timog Amerika mula pa noong Setyembre 2, bilang bahagi ng mas malawak na kampanya laban sa mga drug cartel sa rehiyon.
Gayunman, kinondena ng ilang eksperto sa batas ang nasabing kampanya, na tinawag nilang serye ng extrajudicial killings o pamamaslang na walang due process.
Batay sa mga ulat, hindi bababa sa 145 katao ang nasawi sa 42 pag-atake mula noong Setyembre.
Ipinapakita ni Trump ang kampanya bilang hakbang upang mapigil ang pagpasok ng ilegal na droga sa Estados Unidos.
Subalit hanggang ngayon, hindi pa inilalabas sa publiko ang opisyal na pagkakakilanlan ng mga nasawi, at wala ring inilalabas na ebidensya ang pamahalaan upang patunayan ang umano’y pagkakasangkot ng mga ito sa drug trafficking.
