Mabilis na tinapos nina Jelena Ostapenko at Hailey Baptiste ang kampanya nina Alex Eala at Iva Jovic sa Indian Wells Open doubles competition matapos silang itumba, 6-2, 6-2, nitong Linggo ng umaga sa California.
Bagama’t umabot sa semifinals ng ASB Classic ang duo ni Eala at Jovic sa simula ng taon, hindi nila naulit ang matagumpay na pagtakbo sa Indian Wells.
Nagpakita ng malakas na simula sina Ostapenko at Baptiste, agad na nanguna ng 4-0 sa unang set. Bagamat nabawasan nina Eala at Jovic ang diperensya sa 2-4 sa pamamagitan ng magkakasunod na panalo sa laro, agad namang sinara ng kanilang kalaban ang set sa pamamagitan ng dalawang sunud-sunod na panalo.
Sa ikalawang set, nagkapantay ang laro sa 1-all matapos ma-hold ng duo ng Filipino-American ang kanilang serve. Ngunit nanalo ang Latvian-American pair sa susunod na tatlong laro, 4-1, upang palakihin ang diperensya. Nabawi nina Eala at Jovic ang kanilang serve sa 2-4, subalit hindi nila natalo ang mas malakas na kalaban.
Nagtala sina Ostapenko at Baptiste ng apat na aces at nanalo sa 24 receiving points kumpara sa 17 ng kanilang kalaban, habang nakakuha rin sila ng 29 service points laban sa 22 ng duo nina Eala at Jovic.
Sa kabila ng pagkatalo sa doubles, magpapatuloy pa rin ang laban ni Eala sa Indian Wells. Makakaharap niya si Coco Gauff sa ikatlong round ng women’s singles sa Lunes ng umaga.
