Tiniyak ng Business Permits and Licensing Office na maayos na naipatutupad ng mga gasoline station sa Santiago City ang mga price rollback sa kabila ng sunod-sunod na bawas-presyo sa produktong petrolyo.
Sa panayam ng Bombo Radyo Cauayan kay Atty. Artemio Villaluz Jr.,officer in charge ng Business Permits and Licensing office, sinabi nito na tuloy-tuloy ang kanilang monitoring katuwang ang Philippine National Police (PNP) upang matiyak ang tamang pagsunod ng mga gasolinahan sa mga ipinatutupad na price adjustments.
Aniya, araw-araw silang nagsasagawa ng pag-iikot at pagbabantay batay sa guidelines ng Department of Energy (DOE), na regular na naglalabas ng weekly price advisory tuwing Martes.
Dagdag pa niya, wala pa silang namomonitor na gasolinahan na hindi agad nagpapatupad ng price rollback sa lungsod, at nananatiling maayos ang implementasyon ng mga presyo ng petrolyo.
Binigyang-diin din ng opisyal na mahigpit na ipatutupad ang mga panuntunan ng Department of Energy at papatawan ng kaukulang aksyon ang sinumang gasolinahang lalabag sa mga ito.
