Inatasan ni Justice Secretary Frederick Vida ang mga border control authorities na arestuhin si Senador Ronald “Bato” dela Rosa sakaling tangkain nitong umalis ng bansa.
Sa isang press briefing nitong Biyernes, Mayo 15, sinabi ni Vida na lumagda siya ng Immigration Lookout Bulletin Order (ILBO) laban sa Senador upang bantayan ang anumang galaw nito sa mga paliparan at iba pang exit points.
Ayon sa kalihim, ituturing ng Department of Justice na isang pangungutya sa hustisya ang anumang pagtatangkang makaalis ng bansa ni Sen. Dela Rosa.
Idinagdag pa niya na may mga tiyak na tagubilin para sa mga law enforcement agents at border control authorities na isagawa ang nararapat na aksyon kung makikitang susubukang lumabas ng Pilipinas ng senador.
Nilinaw rin ni Vida na ang ILBO ay hindi direktang nagbabawal sa pag-alis ng isang indibidwal, ngunit nagsisilbi itong babala sa Bureau of Immigration upang agad ipaalam sa DOJ ang anumang tangkang pag-alis ng paksa.
Kinumpirma rin ng kalihim na valid ang arrest warrant ng International Criminal Court (ICC) laban kay Dela Rosa at natanggap na ng Pilipinas ang pormal na kahilingan ng ICC para ipatupad ito. Gayunman, sinabi niyang walang direktang utos para sa manhunt, dahil iginagalang pa rin ng DOJ ang desisyon ng Senado na ilagay ang senador sa protective custody at ang mga nakabinbing petisyon sa Korte Suprema.
Si Dela Rosa, na naging hepe ng Philippine National Police noong administrasyon ni dating Pangulong Rodrigo Duterte, ay kabilang na sa mga itinuturing na wanted ng ICC kaugnay ng drug war.
Ayon pa sa DOJ, may impormasyon sila sa kinaroroonan ng senador ngunit tumanggi itong isapubliko. Nagbabala rin si Vida na huwag tularan ang kaso ng dating Ako Bicol Rep. Zaldy Co na umano’y nakatakas ng bansa habang may kinahaharap na kaso ng plunder.
