Pormal nang nagsimula ang School Year 2026–2027 sa mga paaralan sa Santiago City matapos dumalo ang daan-daang mag-aaral sa isinagawang flag ceremony sa unang araw ng klase ngayong Lunes, June 8, 2026.
Sa Santiago North Central School Integrated SPED Center, maagang nagtipon ang mga estudyante, guro, at mga opisyal ng paaralan bilang bahagi ng pagbubukas ng panibagong taon ng pag-aaral.
Sa panayam ng Bombo Radyo Cauayan kay Ginang Corazon A. Ferrer, Principal III ng paaralan, nakahanda na ang mga guro, silid-aralan, at iba pang pasilidad upang matiyak ang maayos at ligtas na pagbabalik-eskwela ng mga mag-aaral.
Sinabi ni Ginang Ferrer na bago ang pagbubukas ng klase ay nagsagawa ang paaralan ng mga orientation, pagpupulong, at iba pang preparatory activities para sa mga guro upang maging handa ang mga ito sa pagpapatupad ng mga programa at polisiya para sa bagong school year.
Dagdag pa ni Ginang Ferrer, kabilang sa mga isinagawang paghahanda ang pagsasaayos ng mga silid-aralan, pagrepaso sa mga learning materials, at pakikipag-ugnayan sa mga magulang at iba pang stakeholders upang matiyak ang maayos na pagsisimula ng klase.
Binanggit din ni Ginang Ferrer na mahalaga ang pagtutulungan ng mga guro, magulang, at komunidad upang maging matagumpay ang pagkatuto ng mga mag-aaral sa buong taon ng panuruan.
Samantala, nananatiling nakatutok ang pamunuan ng paaralan sa pagpapanatili ng isang ligtas, maayos, at kaaya-ayang kapaligiran sa pag-aaral para sa lahat ng mga mag-aaral ngayong pasukan.
