Ipinagpaliban ng Nation’s Girl Group na BINI ang European leg ng kanilang “Signals” World Tour 2026 dahil sa mga hindi inaasahang pangyayari.
Sa inilabas na joint statement nitong Miyerkules, Hulyo 1, inanunsyo ng grupo na hindi muna matutuloy ang anim na nakatakdang concert sa Europa na orihinal na itinakda mula Agosto 30 hanggang Setyembre 11.
Kabilang sa mga apektadong concert ang mga pagtatanghal sa Amsterdam, Rome, Paris, London, Zurich, at Düsseldorf.
Ayon sa pamunuan, awtomatikong ibabalik ang bayad sa mga nabiling tiket gamit ang parehong paraan ng pagbabayad na ginamit ng mga concertgoer sa kanilang pagbili.
Dahil sa pagbabago ng iskedyul, pansamantalang lalaktawan ng BINI ang kanilang European stops at ipagpapatuloy ang world tour sa Oceania matapos makumpleto ang kanilang North American run.
Matapos ang mga concert sa Estados Unidos at Canada, gayundin ang paglahok sa Summer Sonic Music Festival sa Japan, nakatakdang magtanghal ang grupo sa Melbourne, Australia sa Setyembre 20 bilang susunod na yugto ng kanilang tour.
