Mainit na sinalubong ng libu-libong Blooms ang P-pop sensation na BINI sa pagsisimula ng North American leg ng kanilang “Signals” concert tour sa Neal S. Blaisdell Arena sa Honolulu noong Agosto 1.
Sa social media post ng grupo, nagpasalamat ang walong miyembro sa kanilang mga tagahanga sa mainit na pagtanggap at suporta sa kanilang kauna-unahang konsiyerto sa North America.
Dumalo rin sa naturang palabas ang Filipino-American social media personality na si Bretman Rock.
Matapos ang matagumpay na pagtatanghal sa Honolulu, nakatakdang magtungo ang BINI sa Los Angeles bilang susunod na destinasyon ng kanilang concert tour.
Bago ang North American leg, matagumpay na ring nagtanghal ang grupo sa Dubai, London, Toronto, New York, Maryland, at Illinois.
Samantala, nagpasaya rin ng mga Pilipino sa Canada ang singer at pilot na si Ronnie Liang sa kanyang mga pagtatanghal sa Taste of the Philippines 2026 sa Calgary at Niagara Fiesta Extravaganza 2026. May nakatakda pa siyang pagtatanghal sa Brampton Fiesta Extravaganza 2026 sa Agosto 9.
Ibinahagi ni Liang na malaking karangalan para sa kanya ang makapagbigay-aliw sa mga Pilipino sa ibayong dagat, at layunin niyang ipadama sa mga ito ang init ng kulturang Pilipino sa pamamagitan ng kanyang musika.
Nagbigay rin siya ng update sa nalalapit na “Pinoy Dream Academy Alumni Homecoming” reunion concert na gaganapin sa Setyembre 19 sa Music Museum, kung saan muli silang magsasama-sama ng mga naging kalahok ng unang season ng kompetisyon matapos ang halos dalawang dekada.
