Pinabulaanan ng isang fact-check report ang pahayag ni PDP Laban National Legal Affairs Chairperson Atty. Yvette Contacto na umano’y gumagastos ang gobyerno ng P70 milyon kada araw para sa impeachment trial ni Vice President Sara Duterte.
Lumabas ang naturang pahayag sa isang video na in-upload noong Hulyo 9 sa Facebook page na “Nob Yem Bre,” kung saan nagsasalita si Contacto sa isang media forum sa punong himpilan ng PDP Laban.
Ayon kay Contacto, umaabot umano sa P70 milyon ang ginagastos ng pamahalaan sa bawat araw ng impeachment proceedings at lumalabas na mas malaki pa ito kaysa sa halagang iniuugnay sa mga kwestiyonableng paggasta ng bise presidente.
Gayunman, walang opisyal na rekord mula sa Senado, mga dokumento sa badyet, o pahayag ng impeachment court na sumusuporta sa naturang halaga.
Sa katunayan, sinabi ni Senate President Sherwin Gatchalian noong Hulyo 16 na wala umanong karagdagang gastos ang Senado sa pagsasagawa ng impeachment trial dahil itinuturing lamang itong katulad ng isang regular na sesyon ng kapulungan.
Ipinaliwanag ni Gatchalian na ang prosekusyon at depensa ang sumasagot sa kanilang sariling gastusin gaya ng pagkain, internet, at pag-imprenta ng mga dokumento.
Nauna ring sinabi ni Gatchalian na umaabot sa humigit-kumulang P25 milyon kada araw ang regular na operational expenses ng Senado, kabilang ang sahod ng mga empleyado at bayarin sa mga pasilidad, na ginagastos ng institusyon kahit walang impeachment trial.
Samantala, itinuring ding mapanlinlang ang pahayag ni Contacto hinggil sa P125 milyong umano’y “na-charge” kay Duterte.
Ang nasabing halaga ay tumutukoy lamang sa naging obserbasyon ng Commission on Audit (COA) noong 2023 kaugnay sa paggasta ng Office of the Vice President sa confidential funds sa loob lamang ng 11 araw.
Sa kasalukuyang impeachment case, umaabot sa P612.5 milyon ang saklaw ng unang artikulo ng impeachment, kabilang ang P500 milyon mula sa Office of the Vice President at P112.5 milyon mula sa Department of Education.
Bukod dito, may tatlo pang artikulo ng impeachment na kinakaharap si Duterte na may kaugnayan sa umano’y hindi maipaliwanag na yaman, mga isyu sa procurement at panunuhol, at mga umano’y banta laban kina Pangulong Ferdinand Marcos Jr., First Lady Liza Araneta-Marcos, at dating House Speaker Martin Romualdez.
Ang PDP Laban, na pinamumunuan ni Davao City Mayor Sebastian “Baste” Duterte bilang partido president, ay hayagang tumututol sa impeachment case na kanilang inilarawang may motibong pulitikal.
