Nananatiling taglay ng Tropical Depression Pilandok ang lakas nito habang patuloy na kumikilos pa-kanlurang hilagang-kanluran sa karagatang silangan ng pinakahilagang bahagi ng Luzon.
Batay sa pinakahuling tala ng PAGASA namataan ang sentro ng bagyo sa layong 1,100 kilometro silangan ng Extreme Northern Luzon.
Taglay nito ang pinakamalakas na hanging aabot sa 45 kilometro kada oras malapit sa gitna at pagbugsong hanggang 55 kilometro kada oras. Kumikilos ito pa-kanlurang hilagang-kanluran sa bilis na 10 kilometro kada oras.
Ayon sa PAGASA, wala pang nakataas na Tropical Cyclone Wind Signal sa anumang bahagi ng bansa.
Gayunman, patuloy na pinalalakas ng habagat o southwest monsoon ang epekto ng panahon sa malaking bahagi ng bansa. Inaasahan ang malalakas hanggang gale-force na pagbugso ng hangin sa karamihan ng Luzon at Visayas ngayong Agosto 30, gayundin sa ilang bahagi ng Mindanao.
Inaasahang mararanasan ang malalakas na hangin sa halos buong bansa bago muling makaapekto sa malaking bahagi ng Luzon, Visayas at ilang lugar sa Mindanao sa Setyembre 1.
Pinag-iingat din ng PAGASA ang mga marino dahil sa maalon hanggang magaspang na karagatan sa ilang baybaying-dagat sa Hilagang Luzon at kanlurang bahagi ng bansa. Pinapayuhan ang mga sakay ng maliliit na sasakyang pandagat na huwag nang pumalaot habang umiiral ang naturang kondisyon.
Sa pagtaya ng PAGASA, magpapatuloy ang pagkilos ng Pilandok pa-kanlurang hilagang-kanluran bukas bago lumiko pa-hilagang-kanluran sa mga susunod na araw. Malabo rin umano itong mag-landfall sa alinmang bahagi ng Pilipinas at inaasahang mananatiling malayo sa kalupaan ng bansa.
Posible ring humina ang bagyo at maging isang remnant low pagsapit ng Martes, Setyembre 1, habang nasa bahagi ng Philippine Sea sa timog ng mga isla ng Japan.
