naresto ng mga awtoridad sa Paraguay si dating Pangulong Santiago Peña nitong Biyernes, kasunod ng pagpapatalsik sa kaniya ng mga mambabatas dahil sa umano’y pagkakasangkot sa kontrobersiya sa Ueno Bank.
Batay sa ulat ng lokal na media na ABC, naganap ang pag-aresto ilang sandali matapos ang botohan sa Kongreso na nagresulta sa kaniyang impeachment. Iniulat ding isinailalim siya sa house arrest habang nagpapatuloy ang imbestigasyon kaugnay ng mga alegasyon laban sa kaniya.
Nagsimula ang kontrobersiya nang isailalim sa pangangasiwa ng Central Bank of Paraguay ang Ueno Bank dahil sa kabiguang matugunan ang mga itinakdang pamantayan sa katatagan ng pananalapi. Dahil dito, naapektuhan ang access ng mga kliyente sa kanilang mga deposito at bank accounts.
Kabilang sa mga sinusuri ng mga awtoridad ang umano’y paggamit ni Peña sa kaniyang impluwensiya upang mailagak sa naturang bangko ang pondo ng pamahalaan at pension funds, gayundin ang posibleng conflict of interest dahil sa dati niyang ugnayang pinansyal sa institusyon. Itinanggi naman niya ang mga alegasyon.
Matapos ang kaniyang pagpapatalsik, nanumpa bilang bagong pangulo ang kaniyang bise presidente na si Pedro Alliana, na inaasahang tatapos sa natitirang termino hanggang Agosto 2028.
Patuloy ang imbestigasyon upang matukoy ang posibleng pananagutan ni Peña at ng iba pang indibidwal na may kaugnayan sa kontrobersiya.
