Pinalakas ng Armed Forces of the Philippines (AFP) ang kakayahan nito sa pagbabantay sa karagatan matapos tumanggap ng dalawang unmanned surface vessels o mga sasakyang pandagat na walang sakay na tauhan mula sa Estados Unidos.
Ayon sa US Embassy, personal na ipinagkaloob ni US Ambassador to the Philippines Lee Lipton ang dalawang Devil Ray T38 sa Philippine Marine Corps sa seremonya sa Subic Bay, Zambales noong Nobyembre 4.
Nagkakahalaga ng walong milyong dolyar ang naturang mga sasakyang pandagat na kayang magsagawa ng surveillance at reconnaissance missions, maghatid ng suplay, at maglinis ng mga sea mine.
Ayon kay US Embassy Senior Defense Official Colonel Daniel Oh, makatutulong ang mga ito upang masubaybayan ang mas malawak na bahagi ng karagatan ng Pilipinas sa mas mahabang panahon at mas mababang gastos kumpara sa mga barkong may sakay na tauhan.
Maaari ring kontrolin nang malayuan ang mga sasakyang pandagat o patakbuhin nang awtonomo upang mailayo sa panganib ang mga tauhan ng AFP.
Ang Devil Ray T38, na gawa ng kumpanyang MARTAC sa Estados Unidos, ay may habang 11 metro, kayang tumakbo nang lampas 60 knots at magdala ng hanggang 1,814 kilo ng kagamitan.
Ayon naman sa US Embassy, bahagi ito ng patuloy na kooperasyong pangdepensa ng Pilipinas at Estados Unidos upang palakasin ang maritime security at kakayahan ng bansa na pangalagaan ang mga karapatan nito sa karagatan.
