Patay ang isang hindi pa nakikilalang driver matapos mahulog ang minamanehong sasakyan mula sa national road at bumulusok sa ilog sa Barangay Otucan Norte, Bauko, Mountain Province, nitong Huwebes ng umaga, Oktubre 15.
Ayon sa Bauko Municipal Police Station, lumalabas sa paunang imbestigasyon, tinatayang 70 metro ang ibinagsak ng sasakyan mula sa kalsada bago tuluyang bumagsak sa ilog.
Bandang alas-7:30 ng umaga nang makatanggap ng ulat ang Bauko MPS mula sa Sabangan MPS hinggil sa insidente.
Nagtulungan ang mga pulis mula sa Bauko at Sabangan, mga tauhan ng Bureau of Fire Protection at mga lokal na volunteer sa pagkuha sa katawan ng biktima.
Batay sa medical report, asphyxia o kakulangan ng oxygen sa katawan dulot ng pagkalunod ang ikinamatay ng driver.
Dinala ang mga labi ng biktima sa kaniyang pamilya sa bayan ng Sagada, Mountain Province, para sa burol.
Patuloy namang inaalam ng mga awtoridad ang pagkakakilanlan ng driver at ang sanhi ng aksidente.
Samantala, sunod-sunod din ang naitalang nakamamatay na aksidente sa mga bulubunduking kalsada sa Cordillera nitong mga nakaraang linggo.
Noong Setyembre 15, anim na katao, kabilang ang isang limang buwang sanggol, ang nasawi habang 17 iba pa ang nasugatan matapos mahulog sa bangin ang isang sasakyang may sakay na mga biyahero mula Isabela patungong Bakun, Benguet, sa kahabaan ng Talubin–Barlig Road sa Bontoc, Mountain Province.
Noong Setyembre 23 naman, nasawi ang driver ng isang van at tatlong pasahero ang nasugatan matapos itong bumangga sa bakal na harang at mahulog sa tinatayang 10 metrong lalim na bangin sa Barangay Abiang, Atok, Benguet.
Dahil dito, muling pinaalalahanan ng mga awtoridad ang mga motorista na magmaneho nang maingat, manatiling alerto at tiyaking nasa maayos na kondisyon ang kanilang sasakyan, lalo na sa mga matatarik at paliko-likong kalsada sa Cordillera.
