Pinayuhan ng Embahada ng Pilipinas sa France ang mga Pilipinong naroroon sa bansa na umiwas sa mga lugar na pinagdarausan ng mga protesta at malalaking pagtitipon kasunod ng malawakang kilos-protesta nitong Sabado, Oktubre 17.
Sa advisory na inilabas sa social media, tiniyak ng embahada na wala pang naitatalang Pilipinong nasaktan, naaresto o kabilang sa mga nasawi kaugnay ng mga mararahas na insidente sa Paris at iba pang lungsod sa France.
Ayon sa embahada, mahigpit nilang minomonitor ang sitwasyon at nakahandang magbigay ng tulong sa mga Pilipinong nangangailangan nito.
Batay naman sa ulat ng lokal na media, tinatayang nasa 550,000 demonstrador ang lumahok sa mga protesta sa buong France.
Nauwi sa kaguluhan ang ilang pagtitipon, kung saan naghagis umano ng mga bagay ang ilang nagprotesta sa mga pulis at sasakyang panlaban sa sunog. May mga sasakyan at bisikleta ring sinunog, habang ilang tindahan ang pinasok at ninakawan.
Patuloy na pinapayuhan ang mga Pilipino sa France na manatiling mapagmatyag at sumunod sa mga abiso ng mga lokal na awtoridad at ng embahada.
